فى اشاعات كتير إن اللى بنوا الأهرامات كانوا عبيد وبنوها بالسخرة أو إن اليهود هم اللى بنوها .. أو إن قوم عاد هم اللى بنوها .. وبلغت الاشاعات إن فى ناس اعتقدوا إن اللى بناها مخلوقات من كوكب تانى !!!
وطبعا دى كانت مادة خصبة جدا لأفلام هوليود ا
للى صورت بناة الأهرام دايما كعبيد بيشتغلوا بالسخرة ، فى شكل غير مسبوق لتزييف وتشويه التاريخ !!
كل الكلام ده غير صحيح ... ومفيش أى دليل علمى تاريخى أو جغرافى أو جيولوجى عليه
بدأ علماء الآثار المصريين عمليات البحث والتنقيب عن مقابر بناة الأهرام فعليا سنة 1980 .. وفى أغسطس 1990 وقعت واحدة من السياح من فوق حصانها لما اصطدم بجدار من الطوب على بعد 10 متر بس من المكان اللى العلماء كانوا بيحفروا فيه فعلا قبل كده!!
الحادثة دى كانت نواة الكشف عن مقابر بناة الأهرام .. و بعدها أصبح معروف للعالم كله أسماء ووجوه العمال والنحاتين والرسامين والمهندسين المصريين اللى بنوا الأهرامات
الكشف ده أثبت بالدلائل العلمية والمادية مجموعة من الحقايق من خلال دراسة المقابر ومحتوياتها والمكتوب على جدرانها أهمها :
1 – إن اللى بنوا الأهرامات كانوا عمال مش عبيد ، وأكبر دليل على ده إن العمال اللى ماتوا أثناء البناء نالوا شرف الدفن في مقابر مجاورة لأهراماتهم المقدسة .. ولو كانوا عبيد أكيد مكنوش هيتدفنوا فى المكان ده .
2- تم العثور على أدلة بتوضح أن العائلات الكبيرة المنتشرة في الصعيد والدلتا كانت بتبعت يومياً حوالي 21 عجل ، و23 خروف، لأكل العمال، وفي المقابل العمال مكنوش بيدفعوا الضرايب للدولة .. وده دليل تانى على إنهم مكنوش عبيد ، و بيثبت كمان إن الهرم كان المشروع القومي لمصر كلها، وأن الشعب كله كان بيشارك في بنائه .. كل واحد حسب مقدرته
3- الفنانين والصناع والنحاتين كانوا بيشتغلوا طول السنة , أما الفلاحين من القري والاقاليم كان بيتم تغييرهم كل ثلاثة شهور ..
4- العمل في بناء الهرم كان طول أيام السنة مش في أيام الفيضان بس زى ما كان شايع
5- بناة الهرم الأكبر كانوا حوالى 10 آلاف عامل مش أكتر من كده
6- مقابر العمال كانت متجاورة مباشرة مع مقابر الفنانين والنحاتين
7 - أثبتت الحفائر وجود نظام إداري محكم لتنفيذ العمل العظيم ده , وتم اكتشاف منطقة الإدارة الخاصة بالعمال، والعثور على نقوش زى "المشرف على جانب الهرم"، "مدير الرسامين "، "المشرف على البناء"، "مدير العمال" ، " المفتش على الحرفيين" ... وكان أهم عنوان اتوجد هو "مدير أعمال الملك" وده أهم منصب في مصر القديمة بعد الملك , وكان هو المسئول عن بناء الهرم ، واللى بيرفع للملك تقارير يومية عن سير العمل في بناء الهرم .
8- سنة 2010 تم اكتشاف مجموعة جديدة من مقابر بناة الأهرام
ليست هناك تعليقات:
إرسال تعليق